ภิยฺโย วิกฺกมพาหุสฺส, ตโต ลีลาวติํ สติํ;
สห โภเคน ปาทาสิ, ตทา พนฺธุ หิเตรโตฯ
[51]
วิธาย เอวํ สชเน ชนินฺโท;
นิสฺเสสโต โภคสมปฺปิโต;
ทยาปโร ญาติชนาตมตฺถํ;
สมาจรี นีติปถานุรูปํฯ
สุชนปฺปสาทสํเวคตฺถาย กเต มหาวํเส
สํคหกรโณ นาม
สตฺตปญฺญาสติโม ปริจฺเฉโท
อฏฺฐปญฺญาสติม ปริจฺเฉท
โลกสาสน สํคหกรโณ
[1]
วิจินิตฺวา กุลีเน โส, ชเน สพฺเพ สมาทิย;
สการกฺขาย โยเชสิ, ยถาจารํ มหีปติฯ
[2]
อุจฺจํ ปุลตฺถินคเร, ปาการํ การยี ถิรํ;
เนกโคปุรสํยุตฺตํ, ยุธากมฺมสุรญฺชิตํฯ
[3]
สมนฺตายตวิตฺถิณฺณ-คมฺภีรปริขายุตํ;
อุจฺจปตฺถณฺฑิโลเปตํ, ทุปฺปธํสมราติหิฯ
[4]
อุปสมฺปทกมฺมสฺส, คณปูรกภิกฺขูนํ;
อปฺปโหเนกภาเวน, สาสนฐิติมานโสฯ
[5]
อนุรุทฺธนรินฺทสฺส, สหายสฺสาถ สนฺติกํ;
รามญฺญวิสยํ ทูเต, เปเสตฺวา สหปาภเตฯ
[6]
ตโต อาณาปยิตฺวาน, ปิฏกตฺตยปารเค;
โส สีลาทิคุณาวาเส, ภิกฺขโว เถรสมฺมเตฯ
[7]
เต อุฬาราหิ ปูชาหิ, ปูชยิตฺวา นริสฺสโร;
ปพฺพชฺชา อุปสมฺปตฺติ, การยิตฺวา อเนกโสฯ
[8]
ปิฏกตฺตยญฺจ พหุโส, กถาเปตฺวา สวณฺณนํ;
ลงฺกาโย’สกฺกมานํ โส, โชตยี ชินสาสนํฯ
[9]
ปุตตฺถินครสฺสนฺโต , ปเทสสฺมิํ ตหิํ ตหิํ;
วิหาเร การยิตฺวาน, พหุเก สุมโนหเรฯ
[10]
ภิกฺขโว ตตฺถ วาเสตฺวา, นิกายตฺตยวาสิโน;
ปจฺจเยหิ อุฬาเรหิ, สนฺตปฺเปสิ จตูหิปิฯ
[11]
ผลิกตฺถมฺภกจารุ-ปาการปริขายุตํ;
ปญฺจภูมกปาสาท-ปวเร โน’ปโสภิตํฯ
[12]
สมสนฺตา วาสปนฺตีหิ, สุภาหิ สุวิราชิตํ;
นิรกิณฺณมสมฺพาธ วรภาสุร โคปุรํฯ
[13]
วิหารํ การยิตฺวาน, วตฺถุตฺตยปรายโน;
นิกายตฺตยวาสิสฺส, ภิกฺขุสงฺฆสฺส’ทาสิโสฯ
[14]
สงฺฆสฺส ปากวฏฺฏตฺถํ, รฏฺฐํ ทตฺวา’ฬิสารกํ;
สกลํ สนฺนิวาสีหิ, เนตฺติเกหิ สเหว โสฯ
[15]
เนกสตานิภิกฺขูนํ, วาสยิตฺวาน ตตฺถ โส;
สตตํ สมฺปวตฺเตสิ, อุฬารํ จตุปจฺจยํฯ
[16]
ทาฏฺฐาธาตุฆรํจารุ, การยิตฺวา มหารหํ;
ทาฐาธาตุสฺส นิจฺจํ โส, มหามหมการยิฯ
[17]
คณสงฺคณิกา’เปโต, โปตฺถกํ ธมฺมสงฺคณิํ;
ปริวตฺเตสิ โสปาโต, สุนฺทเร ธมฺมมนฺทิเรฯ
[18]
นจฺจาทิคนฺธมาลาทิ-เนกปูชมฺปวตฺติย;
สีเรน สทฺธาสมฺพนฺโธ, สมฺพุทฺธมภิวนฺทติฯ
[19]
ชมฺพุทีปาคเต จาค, สูโร โส ภุวิริสูรโย;
ตปฺเปสิ ธนทาเนน, ทานิเยเนก โส วิภูฯ
[20]
สทฺธมฺมกถิกานํ โส, ปูชา กตฺวาน เนกโส;
เทสาเปสิจ สทฺธมฺมํ, สทาธมฺมคุเณ รโตฯ
[21]
ติกฺขตฺตุํ โส ตุลาภาร-ทานํ ทิเนสุ ทาปยิ;
อุโปสถํ โวปวสิ, สุวิสุทฺธมุโปสเถฯ
[22]
อทา ทณฺฑิสฺสรํ ทาน-มนุสํวจฺฉรํ วิภู;
ปิฏกตฺตยํ ลิขาเปตฺวา, ภิกฺขุสงฺฆสฺส ทาปยิฯ
[23]
มหคฺฆมณิมุตฺตาทิ-รตนานิ สเปสิย;
ชมฺพุทีเป มหาโพธิํ-เนกกฺขตฺตุม ปูชยิฯ
[24]
กณฺณาฏภูมิปาเลน, โจฬรญฺญา จ เปสิตา;
ทูตามหนฺตมาทาย, ปณฺณาการมิธาคตาฯ
[25]
อทฺทสํสุ มหีปาลํ, ตโต โส ตุฏฺฐมานโส;
เตสํ อุภินฺนํ ทูตานํ, กตฺตพฺพํ สาธุการิยฯ
[26]
เตสุ อาโท’ว กณฺณาฏ-ทูเตหิ สห เปสิย;
ทูเต สกีเย กณฺณาฏ-นิกฏํ สารปาภเตฯ
[27]
อตฺตโน วิสยํ ปตฺเต, โจโฬ สีหฬ ทูตเก;
สหสา กณฺณนาสาสุ, ปาปยิํสุ วิรูปตํฯ
[28]
สมฺปตฺตวิปฺปการาเก, อิธาคนฺตฺวาน ราชิโน;
กถยิํสุ ตทา สพฺพํ, โจเฬน กตมตฺตนิฯ
[29]
อุทฺทิปิตาภิมาโน โส, สกลามจฺจมชฺฌโค;
อวฺหาย ทมิเฬ ทูเต, อิติ โจฬสฺส สนฺทิสิฯ
[30]
เสนํ วินา’ว เอกสฺมิํ, ทีเป มชฺเฌ มหณฺณเว;
พาหาพลปริกฺขาวา, โหตุโน ทฺวนฺทยุทฺธโตฯ
[31]
พลํ สนฺนยฺห สกลํ, รชฺเช ตุยฺหํ มมา’ถ วา;
ตวา’ภิมต โทสมฺหิ, สงฺคาโม วา กรียตํฯ
[32]
มยา วุตฺตกฺกเมเนว, วตฺตพฺโพ โว ชนาธิโป;
อิติ วตฺวาน เต ทูเต, อิตฺถลงฺการ มณฺฑิเตฯ
[33]
วิสฺสชฺชิย ลหุํโจฬ-มหีปาลสฺส สนฺติกํ;
ตโต เสนงฺคมาทาย, อนุราธ ปุรํ คมิฯ
[34]
มตฺติกาวาฏติตฺเถ จ, มหาติตฺเถ จ เปสยี;
โจฬรฏฺฐํ’ว คนฺตฺวาน, ยุชฺฌิตุํ ทฺเว จมูปติฯ
[35]
สชฺชนฺเตสุ จมูเปสุ, นาวาปาเถยฺยกานิ จ;
ยุทฺธตฺถาย พลํ โจฬ-รฏฺฐเปสนการณาฯ
[36]
ตทา ติํสติเม วสฺเส, เวฬกฺการสนามกา;
พลกายา ตหิํคนฺตุ-มนิจฺฉนฺตา วิโรธิโนฯ
[37]
มาเรตฺวาน อุโภ เสนา-นาเถ มตฺตคชาวิย;
สมนฺตโต วิลุมฺปิํสุ, ปุลตฺถิปุรมุทฺธตาฯ
[38]
ปุตฺเตหิ ตีหิ สหิตํ, ราชิโน จ กณียสิํ;
คณิตฺวา สหสา ราช-ปาสาทํ จาปิ ฌาปยุํฯ
[39]
ราชา นิกฺขมฺม ขิปฺปํ โส, คนฺตฺวา ทกฺขิณปสฺสกํ;
เสเล วาตคิริวฺหสฺมิํ, สารํ ภณฺฑํ ฐปาปิยฯ
[40]
วีรพาหุปราเชน, สีหวิกฺกมสาลินา;
มหตา จ พโลเฆน, สมนฺตา ปริวาริโตฯ
[41]
ปุลตฺถิปุรมาคมฺม, วตฺเตนฺโต ทารุณํ รณํ;
ปลาเปสิ ขเณเนว, พลกาเย สมาคเตฯ
[42]
มาริตาน จมูปาน-มฏฺฐิสงฺฆาฏธิฏฺฐิตํ;
ปริกฺขิปิตฺวา จิตกํ, เวริภูเต พลาธิเปฯ
[43]
พนฺธยิตฺวาน ขาณุมฺหิ, ปจฺฉา พาหํ สุพนฺธนํ;
ปริโต วิปฺผุรนฺตีหิ, อคฺคิชาลาหิ ฌาปยิฯ
[44]
ฆาเตตฺวา ตตฺถ มานีตํ, คามานิ ธรณีปติ;
อกาสิ ลงฺกาวสุธํ, สพฺพถา วีตกณฺฏกํฯ
[45]
ยุชฺฌิตุํ สห โจเฬน, ราชา อตฺตกตาวธิํ;
อนติกฺกมฺม โส ปญฺจ-จตฺตาลีสมฺหิ วจฺฉเรฯ
[46]
สนฺนทฺธํ พลมาทาย, คนฺตฺวา สาครปฏฺฏนํ;
ตสฺสาภิคมนํ ปสฺสํ, กญฺจิกาลํ ตหิํ วสํฯ
[47]
อนาคตตฺตา โจฬสฺส, ตสฺส ทูเต วิสฺสชฺชิย;
ปุนาคนฺตฺวา วสีราชา, ปุลตฺถินคเร จิรํฯ
[48]
มหาเหฬิ สเรหรุ, มหาทตฺติกนามิกา;
กฏุนฺนรูปณฺฑวาปี, กลฺลคลฺลิก นามิกาฯ
[49]
เอรณฺเฑคลฺลวาปี จ, ทีฆวตฺถุกวาปิกา;
มณฺฑวาฏกวาปี, จ, กิตฺตคฺคโพธิปพฺพตาฯ
[50]
วลาหสฺส มหาทารุ, คลฺลกุมฺภีลโสพฺภกา;
ปตฺตปาสาณวาปี จ, วาปี จ กาณนามิกาฯ
[51]
เอตา จญฺญา จ โส ฉินฺน-มริยาทา วาปิโย พหู;
พนฺธาเปสิ สทาทีน-สตฺเต พทฺธ หิตาสโยฯ
[52]
ภูมินฺโท กนฺทรา-คงฺคา-นทีสุ จ ตหิํ ตหิํ;
สุภิกฺขํ การยี รฏฺฐํ, พนฺเธตฺวา’วรณานิ โสฯ
[53]
วิหารา’ภยจาริตฺต-เภทินิํ มหิสํสก;
ปริหาเร สพฺพโสจฺฉิชฺช-คาหยิตฺวา คลมฺหิ ตํฯ
[54]
ปุรมฺภา พหิ กาเรตฺวา, มหาสงฺฆํ ขมาปิย;
ปกาเสสิ จ โลกสฺส, สงฺฆคารวมตฺตโนฯ
[56]
มหาคาเม นิกายานํ, ติตเย โจฬนาสิเต;
ธาตุคพฺเภ จ พนฺเธสิ, ถูปารามทฺวเย’ปิ จฯ
[57]
มาตุยา’ฬาหณฐาเน, ตเถว ปิตุโนปิ จ;
อกา ปญฺจ มหาวาเส, ตถา พุทลวิฏฺฐิยํฯ
[58]
ปณฺฑวาปี จ ปาฐีโน, รกฺขเจติยปพฺพโต;
ตเถว มณฺฑลคิริ-มธุตฺถลวิหารโกฯ
[59]
อุรุเวลวฺหโย เทว-นคเร จ วิหารโก;
มหิยงฺคณวิหาโร จ, สีตลคฺคามเลณกํฯ
[60]
ชมฺพุโกลวิหาโร จ, ตเถว คิริกณฺฑโก;
กุรุนฺทิยวิหาโร จ, ชมฺพุโกลกเลณกํฯ
[61]
ภลฺลาตกวิหาโร จ, ตเถว ปรคามโก;
กาสคลฺลวฺหโย จนฺท-คิริวฺหย วิหารโกฯ
[62]
เวลคามวิหาโร จ, มหาเสนวฺหคามโก;
วิหาโร จา’นุราธมฺหิ, ปุเร โพธิฆรํ ตถาฯ
[63]
อิจฺเจวมาทโยเนเก, วิหาเร จ พหู วิภู;
ปฏิสงฺขริชิณฺเณ โส, คาเม จา’ทา วิสุํ วิสุํฯ
[64]
สมนฺตกูฏ เสลตฺถํ, มุนินฺทปทลญฺชนํ;
ปณมตฺถาย คจฺฉนฺตา, มนุสฺสา ทุคฺคมญฺชเสฯ
[65]
สพฺเพ มา กิลมนฺตู’ติ, ทานวฏฺฏาย ทาปยิ;
สาลิกฺเขตฺตาทิสมฺปนฺนํ, คิลีมลยนามกํฯ
[66]
กทลีคามมคฺเค จ, หูวรฬญฺชเส ตถา;
คาเม ทตฺวาน ปจฺเจกํ, สาลาโย จาปิ การยิฯ
[67]
อนาคเต ตํ ภูปาลา, มา คณฺหนฺตู’ติ เลขิย;
อกฺขรานิ สิลาถมฺเภ, ปติฏฺฐาเปสิ ภูมิโปฯ
[68]
คามํ อนฺตรวิฏฺฐิญฺจ, ตถา สงฺฆาฏคามกํ;
สิริมณฺฑคลารามญฺจ, อทาโส ลาภวาสินํฯ
[69]
วนชีวกภิกฺขูน-มทา โส จตุปจฺจเย;
พนฺธูนมฺปิ จ โส เตสํ, โภคคาเม ปทาปยิฯ
[70]
ปาวารคฺคิกปลฺลานิ, วิวิเธ โอสเธปิ จ;
สีเต อุตุมฺหิ พหุโส, ภิกฺขุสงฺฆสฺส ทาปยิฯ
[71]
อทา สพฺพปริกฺขาเร, ปริกฺขาเร ตถาตฺถ โส;
เนกวาเรสุ สกฺกจฺจํ, ภิกฺขุสงฺฆสฺส พุทฺธิมาฯ
[72]
สงฺฆสฺส ปากวฏฺฏตฺถํ, ภิกฺขูนํ ลาภวาสินํ;
เวยฺยาวจฺจกรานญฺจ, ปูเชตุํ เจติยาทิกํฯ
[73]
ปทินฺนา ปุพฺพราชูหิ, เย คามา โรหเณ พหู;
เตปิ สพฺเพ อนูเน โส, ยถาปุพฺพํ ฐเปสิ จฯ
[74]
อทาสิ ปิฐสปฺปีน-มุสเภ พลิโน พหิ;
ภตฺตํ จา’ทาสิ โส กาก โสณาทีนํ ทยาปโรฯ
[75]
อทาสิเนกตา เวยฺย-การกานํ มหากวี;
สทฺธิํ ปเวณิคาเมหิ, วิตฺตชาตมนปฺปกํฯ
[76]
ราชามจฺจาทิปุตฺตานํ, สิโลเก รจิเต สุณํ;
ยถานุรูปํ ปาทาสิ, ธนํ เตสํ กวิสฺสโรฯ
[77]
อนฺธานํ ปงฺคุลานญฺจ, คาเม จา’ทา วิสุํ วิสุํ;
นานาเทวกุลานญฺจ, ทินฺนํ ปุพฺพํ น หาปยิฯ
[78]
ปตฺติ โว โส กุลิตฺถีน-มนาถานํ ยถารหํ;
วิธวานมทาคาเม, ภตฺตอจฺฉาทนานิ จฯ
[79]
ราชา สีหฬกา เวยฺย-กรเณ โส มหาปติ;
อคฺโค สีหฬกาเวยฺย-การกานมโหสิ จฯ
[80]
สุเภ พทฺธาทโร พทฺธ คุณวฺหย วิหารเก;
พนฺเธสิ อุปราชา โส, เจติยํ โจฬนาสิตํฯ
[81]
มุตฺตจาคี ตโต ตสฺส, วิหารปวรสฺส โส;
ทตฺวา คามวเร นิจฺจํ, ปูชาโย สมฺปวตฺตยิฯ
[82]
โสว ตสฺส วิหารสฺส, อุปจารวนนฺติเก;
พนฺธาเปสิ มหาวาปิํ, ถีรีภูตมโหทกํฯ
[83]
กปฺปูรมูลายตเน , รญฺโญ ธีตา ยโสธรา;
อกาเรสิ ถิรํ รมฺมํ, มหนฺตํ ปฏิมาฆรํฯ
[84]
เสลนฺตรสมูหสฺมิํ, ราชิโน ราชิโน สกา;
กาเรสิ จารุปาสาทํ, ปสาทาวหมุคฺคตํฯ
[85]
ตทา เนเก จ สจิวา, ตสฺโส โรธชนาปิ จ;
สมาจินิํสุ ปุญฺญานิ, อเนกานิ อเนกโสฯ
[86]
เอวํ สมนุสาสนฺเต, ลํกํ ลํกา นริสฺสเร;
อุปราชา วสํนีโต, วินีโต เฆรมจฺจุนาฯ
[87]
ตสฺส กตฺตพฺพกิจฺจานิ, สกลานิ สมาปิย;
ชยพาหุสฺโสปรชฺชํ, ภิกฺขูนํ มติยา อทาฯ
[88]
อถาทิปาทปทวิํ, ทตฺวา วิกฺกมพาหุโน;
คชพาหู’ติ วิทิเต, ตสฺส ชาเต สุเต ตโตฯ
[89]
มหามจฺเจหิ มนฺเตตฺวา, ราชาปุตฺตหิตตฺถิโก;
โรหณํ กสิณํ ทตฺวา, ตหิํ วาสาย เปสยิฯ
[90]
ตโต โส ตตฺถ คนฺตฺวาน, มหานาคหุลํ ปุรํ;
ราชธานิํ กริตฺวาน, ตตฺถ วาสมกปฺปยีฯ
[91]
เอวํ ปญฺญาสวสฺสานิ’ห วิชยภุโช วตฺตยิตฺวาน สมฺมา,
อาณาจกฺกํ ชนินฺโท ปฺยปคตขลนํ เอส ปญฺจาธิกานิ;
วฑฺเฒตฺวา สาสนํ ตํ ขลทมิฬภโย ปทฺทุตญฺจาปิโลกํ,
สคฺคํ โลกํ สปุญฺญปฺปภวมุรุผลํ ปสฺสิตุํ จา’รุ โรหฯ
สุชนปฺปสาท สํเวคตฺถาย กเต มหาวํเส
โลกสาสนสํคหกรโณ นาม
อฏฺฐปญฺญาสติโม ปริจฺเฉโท
เอกูนสฏฺฐิม ปริจฺเฉท